Selin Bollati në moderim të këtij emisioni në Top Channel

Një lëvizje e re po përflitet për sezonin e ardhshëm televiziv në Top Channel dhe këtë herë në qendër të vëmendjes është Selin Bollati.

Pas eksperiencës në “Big Brother VIP Albania 5”, Bollati pritet të vijojë angazhimin në ekran, por këtë herë në një rol ndryshe. Sipas Kryefjala.com, ajo pritet t’i bashkohet panelit të emisionit “Goca & Gra” në sezonin e ri.

Nëse informacioni konfirmohet, ky do të jetë një hap i rëndësishëm për Selin në televizion pas daljes nga shtëpia e “Big Brother VIP Albania”, ku ajo u shpall fituese e edicionit të pestë dhe mori çmimin e madh prej 100 mijë eurosh.

Nga roli i konkurrentes në një reality show, Bollati do të kalonte kështu në një format ku diskutimi dhe moderimi janë në qendër, duke u bërë një prej figurave të reja të panelit të “Goca & Gra”.

Programi trajton tema sociale, aktualitetin, marrëdhëniet dhe çështje të ndryshme të jetës së përditshme përmes diskutimit mes protagonisteve në studio.

Në sezonin e fundit, i cili nisi në shkurt, në panelin e “Goca & Gra” ishin Ori Nebijaj, Rozana Radi, Rudina Dembacaj, Sherina Spahiu dhe Ema Andrea.

Ende nuk dihet nëse ardhja e Selin Bollatit do të shoqërohet me largimin e ndonjërës prej tyre apo nëse produksioni po përgatit një formulë më të gjerë dhe ndryshime të tjera në panel.

Për momentin, as Top Channel dhe as vetë Selin Bollati nuk e kanë konfirmuar publikisht angazhimin. Megjithatë, nëse raportimi konkretizohet, fituesja e BBVA 5 do të rikthehet shumë shpejt në ekran, këtë herë në një rol të ri.