Pas përfundimit të serialit të njohur turk “Eşref Rüya”, historia e personazhit kryesor do të rikthehet në ekran me një projekt të ri. Bëhet fjalë për “Eşref Tek”, një produksion që do të fokusohet te e kaluara e personazhit të interpretuar nga Çağatay Ulusoy.
Sipas mediave turke, “Eşref Tek” do të jetë një histori që kthehet pas në kohë, në periudhën kur Eşrefi ende nuk ishte shndërruar në një prej figurave të njohura të botës së krimit. Projekti do të tregojë rrugëtimin që e çoi atë drejt personazhit që publiku njohu në “Eşref Rüya”.
Në qendër të historisë do të jetë edhe kërkimi i Eşrefit për Rüyan, dashurinë e tij të fëmijërisë. Sipas raportimeve, kjo lidhje me të kaluarën do të jetë një prej pikave kryesore të historisë së re.
Rrugëtimi i Eşrefit merr një tjetër drejtim kur ai takohet me Kadirin në Qipro. Miqësia mes tyre i çon drejt botës së Stambollit, ku të dy përballen me rreziqe dhe përpiqen të fitojnë terren në një botë të dominuar nga grupe kriminale.
Ndërsa Eşrefi përpiqet të mbijetojë dhe të forcojë pozicionin e tij, emri i tij nis të bëhet gjithnjë e më i njohur në botën kriminale. Historia do të fokusohet pikërisht te ky transformim dhe te momentet që e formësuan Eşrefin që publiku njohu më vonë.
Në projektin e ri, Çağatay Ulusoy do të jetë sërish në qendër si Eşref Tek. Ndërkohë, detajet e plota për kastin e “Eşref Tek” ende nuk janë bërë të ditura.
“Eşref Tek” pritet të publikohet në Prime Video, ndërsa data e premierës ende nuk është njoftuar. Kompania e produksionit e ka shoqëruar njoftimin me mesazhin: “Një emër. Një fillim. Eşref Tek. Çdo legjendë ka një fillim. Së shpejti.”
Kështu, në vend që historia të vazhdojë pas finales së “Eşref Rüya”, projekti i ri do t’i japë publikut mundësinë të zbulojë si u formua Eşrefi dhe si nisi rrugëtimi që e çoi drejt botës së krimit. /Prive By Liberta Spahiu
Leave a Reply