Pak javë pasi “Logimagazine” zbuloi se Agron Llakaj do të rikthehej në Top Channel, lajmi tashmë është konfirmuar. Aktori dhe moderatori rikthehet në ekranin ku ka kaluar një pjesë të rëndësishme të karrierës së tij, plot 16 vite pas largimit.
Llakaj do të marrë drejtimin e “Portokalli”, spektaklit të humorit me të cilin emri i tij është lidhur që në vitet e para të programit. Përveç moderimit, ai do të rikthehet edhe si aktor në skenë, duke u bërë pjesë aktive e numrave të humorit.
“Është si rikthimi i Odisesë, por unë nuk jam Odise Llakaj, jam Agron Llakaj”, është shprehur ai me humor. Artisti ka përmendur gjithashtu mbështetjen e Lori Hoxhës dhe Top Channel për sezonin e ri.
Sipas Llakajt, ideja nuk është që “Portokalli” të nisë nga e para, por që eksperienca e tij të bashkohet me aktorët dhe krijuesit që janë aktualisht pjesë e spektaklit. Satira mbi aktualitetin do të vazhdojë të mbetet një prej elementeve kryesore të programit.
Sezoni i ri do të ketë edhe shfaqje live për publikun çdo të premte, ndërsa transmetimi televiziv do të jetë të dielave. Ndërkohë, nga 2 deri më 16 shtator do të zhvillohen audicione për talente të reja në aktrim, imitim dhe shkrimin e skeçeve.
Premiera live është parashikuar për 2 tetor, ndërsa më 4 tetor “Portokalli” do të rikthehet në ekranin e Top Channel.
Për Agron Llakajn ky është një rikthim pas 16 vitesh në programin ku për vite me radhë ishte një prej figurave kryesore, këtë herë sërish në rolin e moderatorit dhe aktorit.
Leave a Reply