Një tjetër zhvillim është bërë publik lidhur me çështjen e Jozefin Markut dhe Kristjan Nikollit. Këtë herë, në fokus është Eduard Kuçi, personi që u shfaq në pamjet e sulmit që çuan në nisjen e hetimeve.
Sipas gazetares Anila Hoxha, Kuçi është vendosur në kërkim policor dhe ndaj tij është ngritur akuza e “moskallëzimit të krimit”. Gazetarja sqaroi në emisionin “Breaking” në Top News se Kuçi nuk kishte bërë kallëzim për sulmin.
“Eduard Kuçi nuk e ka kallëzuar krimin, në polici ka thënë se ka qenë një konflikt i thjeshtë për shkak të bllokimit të rrugës me makinë. Më pas policia ka konfirmuar dhe ka bërë verifikimet e nevojshme, ka ngritur akuzën e moskallëzimit të krimit për Kuçin dhe e ka vënë në kërkim policor”, deklaroi Hoxha.
Ajo bëri gjithashtu një dallim të rëndësishëm, duke sqaruar se bëhet fjalë për kërkim policor dhe jo për një masë kërkimi të urdhëruar nga gjykata apo prokuroria. Sipas saj, Kuçi kërkohet për të dhënë sqarime të mëtejshme rreth ngjarjes.
Ndërkohë, Prokuroria e Tiranës ka kërkuar masën e sigurisë “arrest me burg” për Jozefin Markun dhe Kristjan Nikollin. Kjo është një kërkesë e organit të akuzës dhe vendimi për masën i takon gjykatës.
Hetimet vazhdojnë edhe për dëmtimet e mundshme trupore të Kuçit, për të cilat është kërkuar akt-ekspertim, si dhe për përdorimin e simboleve të Policisë së Shtetit gjatë ngjarjes.
Sipas Hoxhës, hetimi nuk nisi pas një denoncimi të Eduard Kuçit, por me iniciativën e policisë pas verifikimit të materialeve që qarkulluan. Çështja mbetet nën hetim dhe akuzat ndaj personave të përfshirë nuk përbëjnë në vetvete një përcaktim fajësie.
Leave a Reply